2025 წლის 15-18 ივნისს, „საზოგადოება ბილიკს“ ესტუმრნენ სარასოტას და დესოტოს გოგონათა და ბიჭების კლუბის (Boys & Girls Clubs of Sarasota and DeSoto Counties) წარმომადგენლები ამერიკელ ახალგაზრდებთან ერთად.
ვიზიტის ფარგლებში სტუმრები გაეცნენ ორგანიზაციის საქმიანობას, მიმდინარე პროგრამებსა და პროექტებს, ასევე პირადად მოინახულეს ყველა ცენტრი, სადაც „ბილიკი“ ბავშვებსა და ახალგაზრდებს მომსახურებას უწევს.
მათ განსაკუთრებით დააინტერესათ ჩვენი დღის ცენტრების საქმიანობა და აქტიურად ჩაერთვნენ შემოქმედებით აქტივობებში. სტუმრებმა მონაწილეობა მიიღეს ხელგარჯილობის სტუდიის მასტერკლასებში როგორც დღის ცენტრ „ბილიკში“, ისე „სხივში“, სადაც მათ თავად დაამზადეს სამაჯურები და სათამაშოები.
სტუმრებისათვის განსაკუთრებული ემოციური მომენტი იყო ბავშვების მიერ ორგანიზებული მცირე წარმოდგენა – სადაც მათ ნახეს და მოისმინეს ქართული ტრადიციული ცეკვები და სიმღერები. ახალგაზრდებს ასევე მიეცათ შესაძლებლობა დაეკრათ ქართულ ნაციონალურ საკრავზე – ფანდურზე.
ვიზიტის ერთ-ერთი მნიშვნელოვანი ნაწილი იყო შეხვედრა „ბილიკის“ Access-ის მოსწავლეებთან და ახალგაზრდული კლუბის წევრებთან. შეხვედრაზე ახალგაზრდებმა გაცვალეს ინფორმაცია ამერიკულ და ქართულ კულტურაზე, ტრადიციებზე და ერთმანეთს დაუსვეს საინტერესო კითხვები.
